8 жастағы баланы ит талады

Атырауда 8 жастағы баланы ит талап тастады деп жазды Atpress.kz. Қабаған ит ер баланың басынан, аяғынан тістеген. Жансақтау бөліміне түскен балаға шұғыл ота жасалды.
Елімізде 2021 жылдың соңында «Жануарларға жауапкершілікпен қарау туралы» заң қабылданды. Осы заңның аясында қараусыз қаңғып жүрген жануарларды бюджет есебінен стерилдеу көзделген болатын. Соның негізінде кейбір облыстарда қаңғыған жануарларды заңда жазылғандай «жануарды хирургиялық, дәрі-дәрмекпен не өзге тәсілдермен ұрпақ өрбіту қабілетінен айыру» көзделген.

Ит пен мысықты стерилдеу (қазақы түсінікте піштіру) қаншалықты нәтиже беретінін қайдам, бірақ қаңғып жүрген иттердің адамдарға шабуы жиілеп барады. Жануардың тұқымын көбейтуге тосқауыл қоюдан да адам ұрпағы өмірінің қауіпсіздігін қамтамасыз ету маңызды қашанда.

JQ-Aqparat