514 шетелдік Қазақстанға келе алмайды

Елімізге 5 жылға дейін 514 шетелдік азаматқа кіруге тиым салынды. Бұл туралы ішкі істер министрлігінің өкілі Шұғыла Тұрлыбек мәлімдеді.

«Қазақстанда шетелдіктердің болу тәртібін қамтамасыз ету мен көші-қон заңнамасын бұзушылықтың алдын-алу мақсатында мемлекетімізде 20 ақпаннан бастап «Мигрант» жедел-алдын алу іс-шарасы өткізіліп жатыр. Полиция шетелдіктердің тұратын мекенжайлары, құрылыс объектілері, нарықтар, шетелдік жұмыс күшін пайдаланатын ұйымдар мен жұмыс берушілерді тексеруде. Полиция шетелдіктердің келуі туралы хабарламаны уақытылы жолдамаған 2 727 жеке және заңды тұлғалар әкімшілік жауапкершілікке тартылды. Мемлекетіміздің көші-қон заңнамасын бұзғаны үшін 514 шетелдік Қазақстан Республикасынан тыс шығарылды. Оның ішінде 130 шетелдік мәжбүрлі түрде тыс шығарылды. Барлық шетелдіктерге Қазақстан Республикасына келуіне 5 жылға дейін тыйым салынды», – деді Шұғыла Тұрлыбек.

Сонымен қатар көші-қон заңнамасын бұзған 6 836 құқық бұзушы анықталды. Бұларыдң арасында 1 814 шетелдік мемлекетте болу тәртібін бұзса, 1886 шетелдік заңсыз жұмыс істеген, 356 заңсыз жұмыс күшін пайдалану фактісі анықталған.

JQ-Aqparat