3 298 мектеп пен 4 214 балабақшада лицензияланған күзет қызметі жоқ

Қазақстанда 3 298 мектеп пен 4 214 балабақшада лицензияланған күзет қызметі жоқ.

ІІМ Күзет қызметін бақылау департаменті басқармасы бастығының орынбасары Серік Құспановтың айтуынша, тиісті лицензиясы бар күзет ұйымдары 3 404 мектеп пен 1 371 балабақшаны күзетеді. Оның ішінде дабыл жүйесі арқылы жедел әрекет ететін мобильді топтар арқылы 2 050-ге жуық мектеп пен 790 балабақша күзетіледі. Қалған объектілер физикалық күзетпен қамтылған. Ел ішінде бас-аяғы 6 702 мектеп пен 5 585 балабақша бар.

С.Құспанов 3 298 мектеп пен 4 214 балабақшада лицензияланған күзет қызметі жоқ екенін атап өтті.

«Оқу орындарында лицензияланған күзеттің болмау себебі мәселесі бойынша күзет қызметтерін сатып алу үшін жергілікті бюджеттен бөлінетін қаражатты негізге алу қажет. Өйткені жеке күзет ұйымдары оларды ақылы негізде көрсетеді», — деді ол.

JQ-Aqparat