105 жастағы әжеге ота жасалды

Алматыдағы №7 қалалық клиникалық ауррухананың травматолог мамандары 105 жастағы әжеге ота жасап, сынған сүйегін орнына келтірді. Бұл туралы клиникалық аурухананың баспасөз қызметі хабарлады.

Алматы қаласының қарт тұрғыны құлап, жамбас сүйгенінің жоғарғы бөлігін сындырып алған. Дәрігерлер сынған сүйекті бүтіндемесе науқастың жағдайы нашарлайтынын айтып, ота жасаған. Екі күннен кейін тірек арбасына сүйеніп тұрған пасиенттің жағдайы жақсы екенін жеткізді дәрігерлер.

«Пациенттің өмірі үшін үлкен жауапкершілікті сезіндік және жас ерекшелігіне байланысты ағзасы анестезияны қалай қабылдайтынын уайымдадық. Өз тарапымыздан әженің өз аяғымен үйіне оралуы үшін барлық мүмкіндікті жасадық», — деді №7 қалалық ауруханасы реанимация бөлімшесінің меңгерушісі Есенай Еспенбетов. Жамбас сүйегінің жабық сынығы тірек-қимыл аппаратының ең ауыр жарақаты болып саналады.

JQ-Aqparat