“Жүрек тоқтап қалуы ықтимал”. Дәрігер балалар арасындағы “қолдан тұншықтыру” ойыны туралы дабыл қақты

Маңғыстау облысында 7 сынып оқушылары арасындағы “қолдан тұншығу” ойыны ел ішінде үлкен резонанс тудырып отыр.

Оқушылар арасында тарап жатқан «талып қалу» ойынына байланысты терапевт-невролог Сәуле Кәрібозова балалар денсаулығына төнетін қауіп туралы нақты ескерту жасады.

«Ойын салдарынан ағзада түрлі қауіпті реакция туындайды. Біріншіден, балалардың басы айналып, көзі қарауытып, есінен танып қалуы мүмкін.
Екіншіден, мұндай қысым вегетативті жүйке жүйесінің түйіндеріне, жүрек-қан тамырларына тікелей әсер етіп, жүрек тоқтап қалуы ықтимал.
Үшіншіден, оқушы құлаған кезде жарақат алып, басына қан құйылуы салдарынан өліп кетуі де мүмкін.
Жүрек-қан тамырларында немесе орталық жүйке жүйесінде мәселесі бар балаларға бұл ойын өте қауіпті», – деді маман.
Маманның айтуынша, мұндай ойындар балалардың физикалық жағдайына ғана емес, психологиялық саулығына да ұзақ мерзімді әсер етуі мүмкін. Сондықтан ата-аналар мен ұстаздар балалардың мінез-құлқына, уақытын қалай өткізетініне бейжай қарамауы тиіс.

Айта кетейік, бұл оқиға 18 сәуір күні Ақтау қаласындағы мектептердің бірінде орын алған. Бейнежазбада 7-сынып оқушысы қыздар әжетханасында қатарластарының қолымен тұншығып, есінен танып қалғаны көрінеді. Оқиға әлеуметтік желіде кең таралып, қоғамның алаңдаушылығын тудырды.

Олжас Әбдіхалық