«Жын шығаратын» емшінің мешітте күзетші болғаны анықталды

Өзін «емші» деп жариялап, жын шығарумен айналысатын Кейқуат Оспанов бұрын мешітте күзетші болып істеген. Атыраудағы «Иманғали» мешітінің баспасөз қызметі: «Кейқуат Оспанов 2009 жылы Атырау қаласының орталық мешітінде бір-екі ай күзетшілік қызметті жасаған. ҚМДБ-ға ешбір қатысы жоқ. Бұйрық мүлдем алмаған», — деп мәлімдеді.

Бала құқықтары жөніндегі Атырау өңірлік уәкілі Айжан Сәрсембаева әлеуметтік желіде таралған ақпараттың анықталып жатқанын айтады.
«Емделген қыз баланың Алматы облысында тұратыны анықталды. Өйткені емші әр өңірге барып, емдеу сеансын жүргізген», — деді Айжан Сәрсембаева.
Кешегі күзетші, бүгінгі емшінің Фейсбуктегі парақшасы түгелдей «жын шығаруға» арналған. «Креативті» емші адам бойындағы жаман қасиеттің бәрін «жынға» жабатын көрінеді.

JQ-Aqparat