Жоғарғы сот ұсынысы: Алаяқ рәсімдеген несиені зардап шегуші төлеуге міндетті емес

12 қараша 2024, 10:39

Жоғарғы Соттың Халықаралық кеңесінің отырысында интернет-алаяқтықтан зардап шеккендердің мүдделерін қорғаудың тәсілдері талқыланды.

Жоғарғы Соттың судьялары Мәдениет Омарбекова мен Баян Тоқтарова интернеттегі алаяқтыққа қатысты істердің жыл сайын артып келе жатқанын атап өтті. Биыл 2022 жылмен салыстырғанда мұндай азаматтық істердің өсімі 270 пайыздан асты.

Заңнамаға онлайн-несие беру кезінде міндетті биометриялық аутентификация және зейнеткерлер мен халықтың осал топтары үшін шектеулер туралы түзетулер ұсынылды.

Жағдайды түбегейлі жақсартуға мүмкіндік беретін тағы бір жаңалық – несиенің клиенттің қатысуынсыз алаяқтық жолмен берілгені сот актісімен анықталған кезде несиелік ұйымдардың қарызды есептен шығару жөніндегі заңмен бекітілген міндеттемесі болмақ.

Бұл норма несиелік ұйымдарды берілген несиелердің сақталуын қамтамасыз ету бойынша шаралар қабылдауға ынталандыруы тиіс.

Халықаралық кеңес әзірлеген ұсынымдар уәкілетті органдарға жіберіледі.

Жоғарғы Соттың баспасөз қызметі

Сурет: Depositphotos.com