Жеңіс Қасымбек: Үлескері жоқ құрылыстар тоқтатылады

Астана әкімі Жеңіс Қасымбек БАҚ өкілдеріне Талдыкөл аумағындағы бейберекет құрылыспен қалай күресетінін айтып берді.

«Бейберекет құрылыстарға келсек, көршілес тұрғын үй кешеннің тұрғындары мен белсенділер шағым айтып жүрген 20-дай нысан бар. Осы нысандардың әрқайсысы бойынша жоспар бар. Бастамашыл топтардың бәрімен ұдайы кездесіп отырамыз. Сол нысандардың шамамен 70 пайызы бойынша нақты шешім бар. Құрылыс иелерімен, тұрғындармен келісіп жатырмыз. Бірнеше қабаты көтерілген, үлескері бар нысандар бойынша сот болып жатыр. Сот шешіміне қарай түпкілікті шешім қабылданады. Ондай нысандар бойынша да жыл аяғына дейін шешім шығарамыз», — деді әкім.
Кейбір нысандардың қабат саны өзгертілуі мүмкін.

«Үлескері жоқ ығы-жығы құрылыстар тоқтатылады. Болашақ тұрғындары белгілі кешендер бойынша ортақ шешімін табамыз – қабат санын азайтамыз, тараптардың бәрінің көңілін табатындай басқа да заңды тәсілдерін ойластырамыз», — деді Жеңіс Қасымбек.

JQ-Aqparat