Жастарға берілетін шағын несиенің кепілді мүлік түрі көбейді

Бүгінгі күннен бастап жастарға жылдық 2,5 пайыз жеңілдікпен шағын несие беру үшін қабылданатын кепілді мүлік түрлерінің тізбесі кеңейтілді.
Кепілмен қамтамасыз ету ретінде қосымша қабылданады:
— екінші деңгейдегі банктердегі шоттарда орналастырылған ақша қаражаты;
— республикалық маңызы бар қалаларда, облыстық маңызы бар қалаларда, аудан орталықтарында, облыстық және аудандық бағыныстағы қалаларда, сондай-ақ ауылдарда және ауылдық елді мекендерде жылжымайтын мүлік;
— жеке меншік құқығындағы/бастапқы ұзақ мерзімді өтеулі жер пайдалану (жалға алу) (егістік) құқығындағы ауыл шаруашылығы мақсатындағы жер учаскелері;
— жайылымдарды суландыру және қоршау инфрақұрылымы бар жер учаскелері;
— бау-бақша өсіруге арналған жер учаскелері;
— мамандандырылған техника.
Шағын несие беру тәртібі, оны қамтамасыз етудің негізгі шарттары мен тәсілдері тапсырма шартында белгіленеді.
Шағын несиенің мөлшері 5 млн теңгеге дейін, ал қатысудың ең ұзақ мерзімі – 5 жылға дейін (кез келген мақсатқа) немесе 7 жылға дейін (мал шаруашылығы саласындағы жобалар үшін). Номиналды сыйақы мөлшерлемесі – жылдық 2,5 пайыздан аспайды.
Шағын несие 21 жастан 35 жасқа дейінгі жастарға өз кәсібін ашуға немесе оны кеңейтуге, 5 жылдан аспайтын мерзіммен жеке кәсіпкер ретінде тіркелген жағдайда беріледі.
Сондай-ақ шағын несие алушылар үшін негізгі борыш пен сыйақыны өтеу бойынша жеңілдікті кезең беріледі, ол шағын несие мерзімі ұзақтығының үштен бірінен аспайды. Шағын несие міндетті түрде кепілмен қамтамасыз етілуі шарт.

JQ-Aqparat