Зауыттағы өрт 14 сағатта сөндірілді

Ақтөбе облысындағы «Жаңажол» газ өңдеу зауытында кеше түс ауа тұтанған қызыл жалын бүгін таңғы сағат 6:20-да сөндірілді. Зауыттың өрт жалмаған аймағында салқындату жұмысы жүргізіліп жатыр.
Ақтөбе облыстық ТЖД баспасөз қызметі өрт сөндірушілер қызыл жалынның 20 тонналық 5 цистерна мен басқа да обьектілердің өртенуіне жол бермегенін айтты.
Кеше 112 пультіне «СНПС-Ақтөбемұнайгаз» АҚ №2 газ өңдеу зауытының аумағы, Мұғалжар ауданы Батпақкөл ауылдық округінің «Жаңажол» кен орнында қондырғы өртенгені туралы хабарлама түскен. ТЖД басшылығы аэровизуальды барлау жұмыстарын жүргізіп, жедел штаб құрылды. Өртті сөндіруге Ақтөбе облысы ТЖД және «Семсер өрт сөндіруші» ЖШС-нен 50-ден астам қызметкер мен 9 техника жұмылдырылды. Өрт кезінде күйіп қалған 4 адам Темір аудандық ауруханасында емделіп жатыр.

JQ-Aqparat