Заңсыз киік аулаған тұрғын қолға түсті

2 маусым күні сағат 11.00-12.00 шамасында Қазталов ауданы Әжібай ауылына қарасты «Мерәлі» қыстағының жанында заңсыз киік аулаған сол ауылдың Ж. деген тұрғыны қолға түсті, деп хабарлайды ҚазАқпарат. Аудандық ішкі істер бөлімінен түскен мәліметке қарағанда, тексеру кезінде «Volkswagen Passat» автокөлігінің ішінен аңшылық қару, мүйізі кесілген 1 бас киіктің ұшасы және мүйізі табылып, тәркіленді. Күні бүгін аталмыш тұрғынға қатысты ҚР ҚК 337-бабы 4-бөліміне сәйкес (заңсыз аңшылық) қылмыстық іс қозғалып, тергеу амалдары жүргізілуде. Айта кетейік, «Қызыл кітапқа» енгізіліп, мемлекет қорғауына алынған киіктер Батыс Қазақстанда негізінен осы Қазталов және Жәнібек аудандарын мекендейді.