Ұлттық ғылым академиясының басшысын Президент тағайындайды

Мемлекет басшысы «ҚР Ұлттық ғылым академиясының кейбір мәселелері туралы» Жарлыққа қол қойды. Бұл ұйым Қазақстан Президенті жанындағы Ұлттық ғылым академиясы болып өзгерді.

«Қазақстан Республикасы Ұлттық ғылым академиясының мәртебесін жоғарылату мақсатында «Қазақстан Республикасының Президенті туралы» ҚР Конституциялық заңының 10 және 33-баптарына сәйкес қаулы етемін:

«ҚР Ұлттық ғылым академиясы» коммерциялық емес акционерлік қоғамын Қазақстан Республикасы Президентінің жанындағы «Қазақстан Республикасының Ұлттық ғылым академиясы» коммерциялық емес акционерлік қоғамы етіп қайта өзгертсін. Ұлттық ғылым академиясының президентін ҚР Президенті лауазымға тағайындайды және лауазымнан босатады деп белгіленсін», — делінген Мемлекет басшысының Жарлығында.

Жарлық жарияланған күннен бастап күшіне енеді.

JQ-Aqparat