Үкімет автобуспен жүру ақысы 500 теңгеге көтеруге қатысты жауап берді

14 қазан 2025, 12:55

Үкімет автобуспен жүру ақысы 500 теңгеге көтеруге қатысты жауап берді, деп хабарлайды jasqazaq.kz.

Жуырла сарапшы Олжас Байділдинов Астанада және Алматыда автобуспен жүру ақысы 500 теңге болуы керек деп, тағы да жұрттың қитығына тиген. Тағы да дейтініміз, мұндай ұсынысты ол екі-үш жыл бұрын да айтқан.

Бүгін Үкімет отырысынан кейінгі брифингте қаржы вице-министрі Ержан Біржанов қоғамдық көлік халыққа бағытталғанын, сондықтан жолақы қымбаттамайтынын мәлімдеді.

Вице-министр: «Жолақының күрт өсуіне жол бермейміз. Әрине, мемлекет бұл тұрғыда қолдау көрсетеді. Егер қандай да бір деңгейде қоғамдық көлік үшін бағалар өсетін болса, тиісті шаралар қабылданады», – деді.

Сондай-ақ ол әлгі пікір министрліктің емес, жеке сарапшының ұстанымы екенін ескертті.