ҰҚК түрмеде отырғандардың теракт жасауына жол бермеді (Видео)

22 қарашада Ұлттық қауіпсіздік комитеті ішкі істер министрлігімен бірлесіп, Алматы облысы прокуратурасының үйлестіруімен Алматы, Қостанай және Жетісу облыстарының қылмыстық-атқару жүйесі мекемелерінде 10 радикалды діни идеология жақтасының әрекетінің жолын кесті.

Алдын ала мәлімет бойынша, фигуранттардың бірі қамауда отырып террорлық акт жасауға дайындалған, ал қалғандары терроризмді насихаттауға қатысқан. Лаңкестік әрекеттерді ұйымдастыру мақсатында адамдарды өз қатарларына тартумен айналысқан.
Жаза өтеу орындарында жүргізілген тінтулер барысында суық қару, смартфондар және басқа да заттай дәлелдер алынды.
Біреуінің экстремизм үшін соттылығы бар. Қалғандары кісі өлтіру, тонау және ұрлық үшін жазаларын өтеген.
Сондай-ақ Алматы қаласында пробациялық бақылауда тұрған олармен байланысы бар адам ұсталды.
Осы адамдарға қатысты Қылмыстық кодекстің 255, 256 және 259-баптары бойынша сотқа дейінгі тергеп-тексеру жүргізіліп жатыр.

JQ-Aqparat
Сурет: ҰҚК баспасөз қызметі