Волонтерлікті дамытудың Жол картасы қабылданды

Өткен жылы волонтерлікті дамытудың 2021-2023 жылдарға арналған Жол картасын іске асыру жұмыстары аяқталды. Соның нәтижесінде волонтерлік ұйымдардың саны 3 есеге артты.
Мәдениет және ақпарат министрлігінің баспасөз қызметі жазғандай, волонтерлік инфрақұрылымды дамыту бағытында  республикалық және 20 өңірлік фронт-офисі жұмыс істейді. Сондай-ақ Qazvolunteer.kz онлайн платформасы іске қосылып, онда 60 мыңнан аса белсенді волонтер тіркелген. 150-ден астам волонтерлік жоба және 700-ден аса волонтерлік бастама іске асты. Азаматтарды волонтерлік қызметке қатысуға ынталандыруға бағытталған «Волонтерлік қызмет туралы» Заңға түзетулер енгізілді.
Сонымен қатар Үкімет волонтерлікті одан әрі дамыту үшін  2024-2026 жылдарға арналған волонтерлікті дамыту мен қолдаудың Жол картасын бекітті. Оны әзірлеуге еліміздің 20 өңірінен 500-ден аса адам қатысты. Аталған бастаманың шеңберінде волонтерлікті дамыту мен қолдаудың Жол картасы үшін 200-ден астам ұсыныс түсті. Негізгі назар салалық волонтерлікті дамытуға бағытталған.
JQ-Aqparat