Вирус тарататын фишингтік интернет-ресурс анықталды

Мемлекеттік техникалық қызмет өкілдері хакерлердің «Trojan Downloader» вирусын тарататын фишингілік интернет-ресурсын анықтады. Бұл туралы олар өздерінің ресми сайтында хабарлады.

«Мемлекеттік қызметтерді алуға тапсырыс берген кезде электронды қолтаңба қалдыру үшін NCALayer бағдарламасын орнату қажеттігін бәріміз білеміз. Мемлекеттік техникалық қызмет «hxxps://ncalayer.info/update.php» дейтін фишингтік интернет-ресурсты анықтады. NCALayer-ді жаңартатын бағдарлама ретінде ұсынылатын ресурс жүктелген соң «Trojan Downloader» вирусын таратады. Сол арқылы қолданушының құрылғысына зиянкес бағдарлама орнатылады.
Соның салдарынан қаскөйлер пернетақтада терілген ақпаратты, парольдерді оқи алады. Тіпті құрылғыға тысқары қосымшалар да орната алады», — деп жазылған ресми мәліметте.
Мемлекеттік техникалық қызмет өкілдері мұндай бағдарламаларды орнатудан, күдікті сілтемелерге өтуден аулақ болу қажеттігін айтып отыр. Өйткені мұндай әрекет жеке мәліметтерге қауіп төндіруі мүмкін.

JQ-Aqparat