Түркістан: «Серпін» бағдарламасы қалай жүзеге асып жатыр?

Оңтүстік аймақтарда мектеп бітірген түлектерді солтүстіктегі университеттерде тегін оқытып, соның есебінен жастарды солтүстіктегі ауылдарда бірнеше жыл жұмыс істеуге міндеттеуді көздейтін «Серпін» бағдарламасының іске қосылғанына біраз жыл болды. Ол қалай жүзеге асып жатыр?

Түркістан облысы әкімдігінің хабарлауынша, «Серпін» бағдарламасының бүгінде тиімділігі артқан. Мәселен, бұрын оқу бітірген студент осы кезге дейін өзі оқыған аймақта 3 жыл жұмыс істеуі керек деген талап болса, қазір еліміздің 11 облысының кез келгенін таңдау құқығына ие. Өзгерістерге байланысты өтеу мерзімі де 2 жылға қысқартылып отыр. Мемлекеттік гранттар Солтүстік Қазақстан, Шығыс Қазақстан, Ақмола, Абай, Павлодар, Қарағанды және Қостанай облыстарындағы университеттерге бөлінеді.

Бұл бағытта Түркістан облысы қоғамдық даму басқармасының «Жастар ресурстық орталығы» КММ-нің қызметкерлерінен жұмысшы топ құрылып, қазір олар Семей қаласының жоғары оқу орындарында білім алып жатқан студенттермен кездесулер өткізуде. Мемлекеттік бағдарламаның тиімділігі жөнінде сұхбаттасып, жатақханалардың жағдайымен танысты.
Түркістандық топ құрамының әуелгі сапары Әлихан Бөкейхан университетінен басталды. Кәсіби дағдыларды дамыту мен сапалы академиялық бағдарламалар аясында 3 факультет және 9 кафедра жұмыс істейді. Ал 2011 жылдан бастап «Әскери кафедра» ашылған. Жалпы бакалавриат – 32, магистратура – 20, PhD докторантура бойынша – 6 білім беру жоспары қамтылған оқу орнына тегін оқуға жастар «Серпін» бағдарламасы арқылы қол жеткізе алады. Сондай-ақ мұнда қажетті құралдармен жабдықталған және қолайлы жағдайлар жасалған 500 орындық «Студенттер үйі» бар. Пікір алмасу нәтижесінде Ә.Бөкейханов университеті мен облыстық «Жастар ресурстық орталығы» арасында меморандум түзіліп, келіссөздер жүргізілді.

Айдос Құсайынұлы