Түркістан облысында 200 гектардан астам жер заңсыз рәсімделген

01 желтоқсан 2023, 10:15

Түркістан облысының прокуратурасы хабарлағандай, Төлеби ауданы әкімдігінің лауазымды тұлғаларына қатысты тергеп-тексеру басталды. Оған ауданның арнайы қорындағы жерді заңсыз актілерді рәсімдеу арқылы аса ірі мөлшерде алаяқтықпен иелену дерегі себеп болған.

Қылмыстық іс бойынша ауданның жер қатынастар бөлімінің басшысы қызмет бабын пайдалана отырып, осы бөлімнің бұрынғы басшысымен алдын-ала сөз байласу арқылы нарық құны 326 млн теңге болатын 200 гектардан астам құнарлы жер учаскелерін заңсыз рәсімдегені бойынша күдікке ілінді.

Түркістан облысының сотқа дейінгі тергеп-тексеру басқармасымен күдікті тұлғалар уақытша ұстау изоляторына қамалды.
Қазір аталған қылмысқа басқа да тұлғалардың қатыстылығын анықтауға бағытталған тергеу жүріп жатыр.

JQ-Aqparat