Түркістан облысы: өнеркәсіп өнімінің көлемі 2,5 пайызға өсіп, 1 трлн теңгеден асты

Мемлекет басшысы Түркістан облысының әкімін қабылдады.
Aqorda.resmi телеграм-каналы жазғандай, Дархан Сатыбалды Түркістан облысының былтырғы әлеуметтік-экономикалық дамуы туралы есеп берді.

Облыс әкімінің баяндауынша, өткен жылы аймақтың негізгі макроэкономикалық көрсеткіштерінде оң динамика байқалған. Мәселен, өңірдегі өнеркәсіп өнімінің көлемі 2,5 пайызға өсіп, 1 трлн теңгеден асқан. Өңдеу өнеркәсібін дамыту үшін жалпы сомасы

30,2 млрд теңге болатын 20 жоба іске қосылып, 594 жаңа жұмыс орны ашылған.
Алдағы 5 жылда өңірдің өз кірісін 100 млрд теңгеге арттыру жоспарланып отыр.

Алдын ала есеп бойынша былтыр жалпы өңірлік өнім көлемі 3,8 трлн теңге болған. Ал ауыл шаруашылығындағы өнім көлемі 1,1 трлн теңгені құраған. Бұл көрсеткіш бойынша Түркістан облысы республикада көш бастап тұр. Саланы әртараптандыру нәтижесінде 3,3 млн тонна көкөніс, бақша өнімдері жиналды. Бұл – рекордтық көрсеткіш.

Ауыл шаруашылығында өнім көлемін арттыруға, суды үнемдеуге ықпал ететін жаңа әдіс-тәсілдер мен технологиялар енгізіліп жатыр.

Облыстағы кәсіпкерлік субъектілерінің саны 211 мыңға жетіп, 1,6 трлн теңгенің өнімі өндірілген.
Облыста жалпы сомасы 407,5 млрд теңге болатын құрылыс жұмыстары жүргізіліп, 898,9 мың шаршы метр тұрғын үй пайдалануға берілген.

Үш мыңға жуық отбасы баспаналы болды.
Былтыр бюджет есебінен 35 мектептің құрылысы жүргізіліп, 20 мектеп ашылды.

«Жайлы мектеп» жобасы аясында облыста үш жыл ішінде 49 мың оқушыға арналған 63 мектеп салынады.
Өткен жылы облыстағы 20 елді мекенге жаңадан ауызсу құбыры тартылды. Тоғыз ауылдағы ескірген су тарту жүйелері жаңартылды.

62 газбен қамту нысанының құрылысы аяқталып, 48 елді мекенге көгілдір отын жеткізілді.

Президент Қасым-Жомарт Тоқаев облыс әкіміне халықтың әл-ауқатын арттыру, өңірдің экономикалық жағдайын жақсарту жөнінде берген тапсырмаларын жүйелі әрі сапалы орындау қажет екенін айтты. Түркістан өңірін дамыту жұмыстарын әрмен қарай жалғастыруды тапсырды.

JQ-Aqparat