Түркістан өңірінде қоғамдық тәртіптің сақталуына айрықша мән беріледі. Осы орайда «Түркістан — қауіпсіз қала» жобасының маңызы зор екенін айту керек. Полиция қызметкерлері тұрғындардың қауіпсіздігін қамтамасыз ету үшін қоғамдық тәртіптің сақталуына, қылмыстың алдын алуға күш салады. «Түркістан — қауіпсіз қала» жобасы басты үш бағытты қамтиды. Бірінші бағыт — қылмыс санын төмендету, екінші бағыт қауіпсіздікті қамтамасыз етуді көздесе, үшінші бағыт қоғамдық-саяси ахуалға әсер ететін мәселелерді шешуге бағытталады.
Түркістан облысы Полиция департаменті бастығының орынбасары, полиция полковнигі Асылжан Қалдарбеков jasqazaq.kz сайтына «Қауіпсіз қоғам» жобасының жүзеге асырылуы жөнінде айтып берді.
7 тәулікте полиция123 қылмысты ашқан. Оның ішінде есірткіні заңсыз сақтау мен тасымалдауға байланысты 20 фактіні анықтады. Тұрғылықты жері бойынша профилактикалық есепте тұрған 2920 адам тексерілген.
Асылжан Қалдарбеков: «Жыл басынан 6323 әкімшілік құқық бұзушылық анықталды. Оның 202 дерегі заңсыз сауда фактісі бойынша тіркелді. Түнгі уақытта ойын-сауық орындарында немесе үйден тыс жерде 359 жасөспірімнің жалғыз-жарым жүргені анықталды. Жүргізушілердің мас күйінде автокөлікті басқаруының 10 фактісі тіркелді, жолдың қарама-қарсы бетіне шығудың 12 фактісі расталып, құқық бұзушыларға шара қолданылды. Бұрын сотталғандар мен ІІО-да есепте тұрған өзге де адамдардың заңды талаптарды орындауы назарға алынды», — деді.
«Қауіпсіз қоғам» жобасының басты мақсаты — қылмыс санын азайтумен қатар, қала тұрғындарының қауіпсіздігін қаматамсыз ету, құқық бұзушылықты азайту. Сондай-ақ жобаны жастар арасында барынша насихаттау жағы да қалыс қалмайды. Алдағы уақытта жобаны жүзеге асыруда нақты шаралар жалғасын табады.
Мақпал Махаметқызы,
Түркістан облысы
Суреттер Түркістан облысы полиция департаменті баспасөз қызметі
WhatsApp: +7 705 717 9113
