Түркістан: Бу-газ қондырғысының құрылысы талқыланды

Президент Қасым-Жомарт Тоқаевтың Қазақстан Халқына Жолдауын іске асыру бағытында Түркістан облысында қуаты 1000 МВт болатын бу-газ қондырғысын салу көзделген. Бүгінде Сайрам ауданында осы қондырғының құрылысы жүріп жатыр. Түркістан облысының әкімі Нұралхан Көшеров стратегиялық нысанның құрылысына қатысты мәселелерді талқылау үшін жиын өткізіп, жауапты басшылар мен тұлғалардың есебін, ұсыныс-пікірлерін тыңдады.

Нұралхан Көшеров: «Бұл – аса маңызды жоба. Сондықтан оның құрылысы уақытылы әрі сапалы жүргізілуі тиіс. Жұмысшылар санын көбейтіп, жобаны жандандыру қажет. Облыс әкімдігі тарапынан толық қолдау көрсетіледі», — деп атап көрсетті.

«Түркістан БГҚ» ЖШС басшылығының мәліметінше, инфрақұрылым тарту, газ, электр жүйелерімен қамту жұмыстары жалғасуда. Қажетті жер телімдерін мемлекет меншігіне өткізу шаралары да қатар атқарылуда. Акционері – «Самұрық-Қазына» АҚ. Бүгінде бетондау жұмыстары 64 пайыз орындалды. Металл конструкцияларды монтаждау бойынша жұмыстар 9,2 пайызға атқарылған. Қажетті құрал-жабдықтары мен металл конструкциялары жеткізілуде.
Жиында өзге де мәселелер талқыланып, тиісті тапсырмалар берілді.

JQ-Aqparat
Сурет: Түркістан облысы әкімінің баспасөз қызметі