Тимур Сүлейменов: Теңгенің жаңа дәуірі басталды

Қазақстанда сенімді қаржылық инфрақұрылым мен нарықтық экономикаға бейімделген банк жүйесі құрылды. Жоғары сапалы қаржылық қызметтер еліміздің әрбір тұрғынына қолжетімді.

Бұл туралы Ұлттық банк төрағасы Тимур Сүлейменов Қазақстан қаржыгерлерінің XI конгресінде айтты.
«Зайырлы мемлекет қалыптасу кезеңінде теңгенің енгізілуі толыққанды қаржы жүйесін қалыптастыруға және еліміздің мемлекеттілігінің іргетасын нығайтуға мүмкіндік берді. Ол ақша-несие саясаты тәуелсіздігінің негізін қалады», — деді Ұлттық банк төрағасы.

Тимур Сүлейменов соңғы бес жылда қолма-қол ақшасыз төлемдерді ілгерілету және қаржылық қызметтерді цифрландыруды қамтамасыз етуде жетістіктерге қол жеткізілгенін атап өтті.

«Бүгін теңгеге — 30 жыл. Теңгенің жаңа дәуірі басталды. Біз ұлттық валютаның – цифрлық кеңістіктегі дәуірдің куәсі болдық. Цифрлық теңге — қаржы жүйесінің жаһандық трансформациясына әсер ететін ең маңызды тренд екенін білесіздер», — деді ол.
Ұлттық банк төрағасының сөзінше, бүгінде Қазақстанда сенімді қаржылық инфрақұрылым мен нарықтық экономикаға бейімделген банк жүйе құрылды. Жоғары сапалы қаржылық қызметтер еліміздің әрбір тұрғынына қолжетімді.

JQ-Aqparat