Тимур Елеусізов бір сөз үшін 73 840 теңге төледі

«Басқа бәле – тілден» деп атам қазақ бекер айтпаған. Алматы қалалық мәслихатының депутаты Тимур Елеусізов кеше қалалық мәслихаттың кезектен тыс сессиясында сөйлеп отырып, аузынан жаман сөз шығып кеткенін өзі де байқамай қалды. Мұның өзі жұрт арасында едәуір талқыға түсті. Егер де сол жиында отырған біреу видеоға түсіріп, таратып жібермегенде жабулы қазан күйінде қалатын ба еді, кім білсін. Бірақ бізде боғауыз айтқаны үшін айыппұл салынады. Сондықтан мәслихат депутатына бүгін айыппұл төлеуге тура келді. Айыппұл көлемі 20 айлық есептік көрсеткіш (73 840 теңге).

Бір сөз үшін басы бәлеге қалған Елеусізов өзінің Инстаграм парақшасында: «Полиция басқармасына келіп, түсініктеме жаздым. Мені ұсақ бұзақылық жасағаным үшін ҚР ӘҚБтК-нің 434-бабы бойынша жауапқа тартты. Жіберген қателігің үшін жауап беру керек. Бұл заң алдында барлығының тең екендігінің жақсы үлгісі», — деп жазды.

JQ-Aqparat