Тбилиси төрінде тартысқа түседі

24-26 наурыз аралығында Грузияның астанасы Тбилиси қаласында дзюдодан Grand Slam турнирі өтеді. Маңызды додаға әлемнің 62 елінен 440-қа жуық балуан қатысады деп жоспарланып отыр.

Ерлер мен қыздар арасындағы аламанға елімізден 24 спортшы аттанады. Қыздар арасындағы сында гран-при турнирінің чемпионы, әлем чемпионатының жүлдегері Әбибә Әбужақынова, Ғалия Тынбаева, Кәмила Берліқаш сынды талантты аруларымыз бақ сынайды. Ерлер додасында жастар арасында өткен әлем чемпионатының жеңімпазы, мастерс турнирінің жеңімпазы Мағжан Шамшадин, әлем чемпионатының күміс жүлдегері Ғұсман Қырғызбаев, Нұрлыхан Шархан сынды талапты балуандар белдесуге түседі.

Grand Slam турнирінде чемпион атанған балуанға әлемдік рейтингте 1000 ұпай беріледі, күміс жүлде алған спортшыға 700, қола жүлдегер атанған балуан 500 ұпай олжалайды. Дзюдо күресінен жазғы Олимпиада ойындарының жолдамасы Халықаралық дзюдо федерациясының (IJF) рейтингіне қарай таратылады. Яғни әлемдік рейтингте алдыңғы сапта тұрған балуандар Олимпиада жолдамасын иеленеді.

JQ-Aqparat