Танымдық тарихи экскурсия

31 мамыр саяси қуғын-сүргін құрбандарын еске алу күні қарсаңында «Атамның аманаты» қоғамдық бірлестігі «Даналық» жоғары медициналық колледжінің студенттері үшін «АЛЖИР» мұражай-мемориалдық кешеніне экскурсия ұйымдастырды.

Бұған дейін болашақ дәрігерлер «Берлин-Сочи-Астана» ресейлік-қазақстандық форсайт ойынына қатысып, жүлделі үшінші орынға ие болған еді. Бұл саяхат бір жағынан жасөспірімдерді ынталандыру мақсатында, екінші жағынан еліміздің өткен тарихын тереңірек танып-білулері үшін ұйымдастырылды.

Мемориалдық кешенді аралау барысында балалар Қазақстанда 1921-1954 жылдар аралығында 103 мың адамның репрессияға ұшырап, олардың 25 мыңнан астамы атылғаны туралы естіп білді. Ал, «АЛЖИР» әйелдер түрмесінде негзінен қазақ ұлтының қаймағы — көрнекті ғылым, мәдениет, саясат қайраткерлерінің жұбайлары отырғаны белгілі.
Олардың тәлкекке ұшыраған тағдырлары туралы әңгімелерді тыңдап, сол кезгі лагерьдің қатал тәртібін өз көздерімен көргендей болған студенттер бұл сапардан ерекше әсер алып қайтты.

Абзал Ибрагим