Тағы да Жамбыл облысы: мектеп дәретханасында 15 жастағы баланы өз қатарластары ұрып өлтірген (Видео)

Сурет: Depositphotos.com

Жамбыл облысында екі оқушы қатарластарының қолынан қаза тапты. Жантүршігерлік жағдайдың бірі Шу ауданындағы Көкқайнар ауылында, екінші қайғылы оқиға Тараздағы мектепте болды, деп хабарлайды jasqazaq.kz КТК-ға сілтеме жасап.

Мәліметтерге қарағанда, мектеп дәретханасында 15 жастағы баланы өз қатарластары ұрып өлтірген. Ал шалғайдағы Көкқайнар ауылында 11-сыныптың бірнеше оқушысы 15 жастағы баланы футбол матчынан кейін жабылып ұрыпты.

Тараздағы 9-шы мөлтекауданда орналасқан орта мектептің ұжымы болған жағдай туралы тіс жармауға бекінгендей. Алайда мектеп маңында жүрген бала құқығы жөніндегі Жамбыл облысындағы уәкіл қайғылы оқиғаны растап отыр. Оның айтуынша, мектеп директорын болған жағдайды анықтау үшін полиция бөлімшесіне алып кеткен.

Байжан Байгелді, Жамбыл облысы ПД бастығының орынбасары: — Аталған дерек бойынша ҚР ҚК 106-бабының 2-бөлігімен сотқа дейінгі тергеу жүргізілген. Қазір істі толық, обьективті, жан-жақты тергеуді қамтамасыз ету бойынша барлық жедел Іс-шаралары жүргізіліп жатыр.

Биыл оқу жылы басталғанына екі апта өтпей, өңірде үшінші оқушы өлімі тіркеліп отыр. 1 қыркүйекте мектептен шыққан 14 жастағы оқушы пышақ жарақатынан қаза тапқан. Жасөспімді бір мектепте оқыған колледж студенті көпшіліктің көзінше пышақтап кеткен.