Спорттағы жетістік неге құлдырады?

2000-2021 жылдар аралығында Олимпиада ойындарында ұлттық құрама спортшылары жеңіп алған лицензия саны 111-ден 98-ге дейін қысқарып, нәтиже төмендеп кетті. Әсіресе соңғы Токио жазғы Олимпиадасынан еліміздің спортшылары алғаш рет күміс пен алтын медальға қол жеткізе алмады. Тәуелсіз ел тарихында жазғы Олимпиада (қысқы Олимпиада ойындарында да көрсеткішіміз тым төмен) ойындарынан 2020 жылға дейін алтын һәм күміс медальсіз қайтқан емес. Тоқыраудың себебін мәдениет және спорт министрлігінің өзі жария етті.

«Есеп комитеті аудитінің қорытындысы бойынша 2000-2021 жылдар аралығында Олимпиада ойындарында ұлттық құрама командалар жеңіп алған лицензия саны 111-ден 98-ге дейін, оған қатысатын спортшылар 130-дан 97-ге дейін төмендеген. Ал жалпы жеңіп алынған орындар санынан алтын және күміс медальдар 0% дейін кеміді. Атап айтқанда алтын 43%-дан, ал күміс медаль жалпы жүлде санының 57%-нан 0%-ға дейін төмендеді. Бұл ретте 2018-2020 жылдары спорттың барлық түрін дамытуға 646 млрд теңге бөлінді. Қаражаттың 72% спорттың ел үшін басымдығы мен маңызын есепке алмай бағытталды», — деп жазылған мәдениет және спорт министрлігі жариялаған реттеушілік саясаттың консультативтік құжатында.

JQ-Aqparat