Сот айыпталушының 5 жастағы баласымен ақылдасып, шешім шығарды (видео)

Айыпталушының бес жастағы баласымен ақылдасып шешім шығарған судья жұртты таңғалдырды. Бұл туралы Қамшы агенттігі хабарлады.

Тыйым салған жерге көлігін қойғаны үшін айыпталған ер адам сотқа 5 жастағы баласын ертіп келген. Балақайды көрген сот оны жанына шақырып алып, алдына отырғызып бірнеше сұрақ қояды.

Джейкоб есімді бүлдіршін кідірместен жауап берген. Сонымен қатар, келешекте аспаз болуды армандаған бала пиццаны жақсы көретінін айтады.

Сот балаға әкесіне қатысты үш шешімнің бірін шығаратынын ескерткен: $90 айыппұл салу, $30 немесе мүлде айыппұл салмау.

«Соның қайсысы дұрыс?» деп сұрайды Джейкобтан. Балақай ойланбастан екінші нұсқаны таңдаған.

Осы сәтте судья баладан таңғы асын ішкен, ішпегенін сұрайды.

«Жоқ» деп жауап берген балаға, «Онда мен әкеңе айыппұл салмаймын. Сол $30-ға саған таңғы ас алып берсін», — дейді сот.