«Сорос-Қазақстан»: өңін өзгертсе де, өзегі қалды

Елімізде 1995 жылдан бері жұмысын жүргізіп келе жатқан «Сорос-Қазақстан» қоры CAPS (Central Asian policy studies) Unlock сарапшылық-талдау орталығы болып трансформацияланды.
Орталықтың ендігі міндеті – «аймақтағы түйткілді мәселелерді шешуде ең үздік қадамдарды даярлау».

CAPS Unlock қызметі әлеуметтік-экономикалық теңсіздік, цифрлық демократия, білім, климаттың өзгеруі, аймақтың тарихи бағытының салдарына зерттеу жүргізіп, пікірсайыс ұйымдастыру болмақ.

Қор өкілдері айтқандай: «Аймақтық талдау орталығын құру — қордың жаһандық жаңғыруының бір бөлігі. CAPS Unlock мақсаты — қоғамдағы осал топтардың құқығы мен мүддесін қорғау».
Осы қордан ақша алып келген біздің «грант жегіштерді» қаржы мәселесі алаңдатары сөзсіз. Оған қор жауабы мынадай: CAPS Unlock «Ашық қоғам» қорының серіктесі болып қала береді. Соңғысы екі-үш жыл қолдау көрсетеді. Сонымен бірге орталық фандрайзингпен айналыспақ, «өйткені зерттеуге, сарапшыларға берілетін грантқа қаржы керек».

CAPS Unlock атқарушы директоры Аида Айдарқұлованың айтуынша, донорлықтан сарапшы рөліне ауысу оңайға соқпайды. «Біз бұрынғы бюджетті, яғни 2 млн долларды сақтап қаламыз деген үміттеміз», — дейді ол.

Отыз жылға жуық уақыт ішінде «Сорос-Қазақстан» қоры денсаулық сақтау, білім, ғылым, өнер, адам құқығын қорғау, БАҚ-ты қолдау, экономикалық реформалар саласына 100 млн доллардан аса грант бөлді.

JQ-Aqparat