Содырлар сапындағы 45 отандасымыз елге қайтарылды

Биыл террористер Ақтөбе мен Алматыдағы террактiден басқа тағы 9 экстремистiк шабуыл жоспарлаған. Жалпы, 2011 жылдан берi Ұлттық қауiпсiздiк комитетi дайындалып жатқан 64 террактiнiң жолын кескен.  Лаңкестер халық көп жиналған орындарға және құқық қорғау, арнайы мемлекеттiк органдарының қызметкерлерiне  шабуыл жасамақшы болған. 

«Ауғанстан, Сирия және Ирақта қарулы қақтығыс басталған уақыттан берi халықаралық лаңкестік ұйымдардың лагерінен  Қазақстанның 45 азаматы елге қайтарылды. 33 жерлесіміз өз еркімен оралды. Бұлардың 33-і қылмыстық жауапкершiлiкке тартылды», — дедi бүгiн Астанада өтiп жатқан жиында Ұлттық қауiпсiздiк комитетi төрағасының орынбасары Нұрғали Бiлiсбеков.

Соңғы бес жылда елiмiзде террористiк және дiни экстремистiк сипаттағы қылмыс жасаған 445 адам сотталған.  Жыл басынан берi 25 адам сотталса,  50-ге жуық азамат тергеу қапасында отыр.