Маусым айы басталғанда еліміздің аумағында «Жер-2024» республикалық командалық-штабтың оқу-жаттығуы қарқын алды. Мұндай оқу-жаттығу азаматтық қорғаудың мемлекеттік жүйесінің басқару органдарының күштері мен құралдарын жойқын жер сілкінісі туындаған жағдайда төтенше жағдайларды жою кезіндегі іс-қимылдарға дайындау тақырыбында өткізіледі.
Оқу-жаттығу жойқын жер сілкінісі нәтижесінде туындаған төтенше жағдайларды жою кезіндегі іс-қимылдарға азаматтық қорғаудың мемлекеттік жүйесін жетілдіру мақсатында жүргізіледі. Оқу-жаттығуларды дайындау мен өткізуге азаматтық қорғаудың барлық мемлекеттік жүйесі тартылады.
Еліміздің сейсмикалық қауіпті өңірлерінде мұндай оқу-жаттығулар жиі өткізілуі тиіс. Әсіресе, биыл қыс-көктем айларында Алматыда болған жер сілкінісі бейқам отыруға болмайтынын, тұрғындардың төтенше жағдайларға әркез дайын болу керек екенін еске салды. Президент Қасым-Жомарт Тоқаев: «Тиісті оқу-үйрету шаралары мектептен, тіпті балабақшадан басталуы керек. Бұрын Алматыда осындай тәжірибе болған. Соны қайта жаңғырту қажет. Себебі қазір азаматтарды төтенше жағдайға дайындау жүйесі талапқа сай емес. Құзырлы органдар халыққа жан-жақты түсіндіру жұмысын жүргізуге тиіс. Оқу орындарында, мемлекеттік мекемелерде тұрақты жаттығу өткізіп тұру қажет. Бұл – өте маңызды. Осы жұмысты дереу қолға алу керек», — деп сол кезде атап көрсеткен еді.
Шымкент қаласы да сейсмикалық қауіпті аймақта орналасқан. Сондықтан мұнда да қауіпсіздік шаралары қолға алынып, оқу-жаттығу өткізіліп тұрады.
Мәселен, күні кеше жер сілкінісіне дайындық мәселелері бойынша оқу-жаттығу іс-шарасы өтті. Іс-шарада жер сілкінісі орын алған жағдайда азаматтық қорғау қызметтерінің авариялық-құтқару жұмыстарын жүргізу кезіндегі даярлықтары пысықталды.
Сағат 16:00-де қалалық құлақтандыру жүйесі іске қосылып, негізгі оқу-жаттығудың бірі қала әкімдігі ғимаратында өтті. Дер кезінде қызметкерлерді қауіпсіз жерге шығару және адамдарды құтқару жұмыстары ұйымдастырылды. Зардап шеккен 1 адамға медициналық көмек көрсетілді. Оқу-жаттығуға жалпы ТЖД қызметтерінен 8 техника жұмылдырылды.
Шымкент қаласы ТЖД Азаматтық қорғаныс басқармасының бастығы Нұржан Қаракөзевтің айтуынша, практикалық іс-шаралар қалада бір мезетте әлеуметтік нысандарда, көпшілік орындарда жүргізілді.
Аталмыш іс-шарада республикалық, өңірлік азаматтық қорғау қызметтері және жергілікті атқарушы органдар жойқын жер сілкінісі жағдайында іс-қимылдарды пысықтайды. Оның барысында авариялық-құтқару жұмыстары, зардап шеккен тұрғындарды шұғыл қабылдау пункттері, оларды қабылдау мен көмек көрсетуге арналған шатырлы лагерлер құрылады. Оқу-жаттығу іс-шарасы жалғасып жатыр.
JQ-Aqparat
Суреттер: Шымкент қаласы Өңірлік коммуникациялар қызметі
WhatsApp: +7 705 717 9113
