Шымкент: Тұрғын үй кезегіндегі азаматтарға берілетін пәтер саны артпақ

Биыл Шымкент қаласында жыл соңына дейін мемлекеттік бағдарлама аясында 324 арендалық пәтер тұрғын үй кезегі келген халықтың әлеуметтік жағынан әлсіз тобына, көпбалалы отбасыларға сонымен қатар жетім және ата-ананың қамқорлығынсыз қалған балалар санатындағы азаматтарға, тұрғын үй кезегіндегі мемлекеттік қызметкерлерге, ал 888 пәтер жұмыс істеп жүрген жастарға қолдынысқа беру көзделген. Бұл жөнінде қала әкімінің баспасөз қызметі мәлімдеді.

Бұдан бөлек жыл соңына дейін тұрғын үй кезегіндегі әр түрлі санаттар бойынша тағы 505 отбасыны қамту жоспарлануда. Қазіргі таңда бұл бойынша тиісті мекемеге ұсыныс беріліп, жұмыстар атқарылуда. Осылайша биыл тұрғын үй кезегіндегі азаматтарға табысталатын пәтер саны артпақ.

Сонымен қатар биыл Отбасы банк арқылы несиелік негізде 1732 отбасыны баспанамен қамту жоспарланып, қазір 973 азамат ипотекалық бағдарламалар арқылы баспаналы болды. Оның ішінде «5-20-25» бағдарламасы бойынша 609 пәтер, «2-10-20 Бақытты отбасы» бойынша -293 пәтер, «Шаңырақ» бағдарламасы — 71.

Шымкентте 2023 жылы мемлекеттік бюджет есебінен 12,9 млрд теңгеге 3342 пәтерлі 72 көпқабатты тұрғын үйдің (254,2 мың шаршы метр) құрылысын жүргізу жоспарланған. Оның ішінде, жалгерлік 29 үй (1364 пәтер), кредиттік 43 үй (1978 пәтер) салынады. Жыл қорытындысы бо­йынша 3072 пәтерлі 67 тұрғын үйді пайдалануға беру қарастырылған.

Айта кету керек, «Отбасы банк» тұрғын үй құрылыс жинақ банкi» АҚ – еліміздегі тұрғын үй құрылыс жинақ жүйесін жүзеге асыратын бірден-бір банк. Ұйым Еуропалық құрылыс жинақ кассалары федерациясына (ЕҚЖКФ) және Халықаралық тұрғын үйді қаржыландыру одағына кіреді. Банкінің жалғыз акционері – «Бәйтерек» Ұлттық басқарушы холдингі» АҚ.

Бұдан бөлек, Шымкент қаласының тұрғындарын баспанамен қамтамасыз етуге арналған жаңа бағдарлама «Qamqor» деп аталады. Оның шарттарына сай 10 пайыздық алғашқы жарнамамен тұрғын үй алуға мүмкіндік туып отыр. Бағдарлама бойынша несиелендірудің бірінші траншы 3 млрд теңгені Шымкент қаласының әкімдігі бөліп отыр. Бұл бағдарламаға дәрігерлер, медбикелер, санитарлар, мұғалімдер, тәрбиешілер, жоғары оқу орындары мен колледждердің оқытушылары, ғылыми-зерттеу институттарының ғылыми қызметкерлері, мәдениет, спорт қызметкерлері, журналистер, қалалық мемлекеттік ұйымдар мен Ха­лыққа қызмет көрсету орталық­та­рының қызметкерлері және энергетика саласының өкілдері қатыса алады.

Мерей Әлімбек