Шымкент: Эпидемиялық жағдайды бақылауда ұстау — басты назарда

Биылғы жылдың 8 айында Шымкент қаласында ЖРВИ аурушаңдығы өткен жылдың сәйкес кезеңімен салыстырғанда 14,15%-ға төмендеді. Алайда, тұмау көрсеткіші 1,66 есеге өсіп, эпидемиологиялық жағдай нашарлады. 2023-2024 жылдың эпидемиологиялық маусымында (қазаннан сәуірге дейін) тұмаудың 138 жағдайы А (H3N2) түрімен, ал 1 жағдайы В түрімен тіркелді. Өткен маусымда А (H3N2) бойынша 3, ал В түрімен 103 жағдай анықталған болатын. Сырқаттанушылық 1,3 есеге өскен, ал ауруға шалдыққандардың 33%-ы – 14 жасқа дейінгі балалар. Бұл туралы Өңірлік коммуникациялар алаңында өткен брифингте Шымкент қаласының санитарлық-эпидемиологиялық бақылау Департаменті басшысының орынбасары Айгүл Тұрымбетова мәлім етті.
Шымкент қаласында ЖРВИ, тұмау және COVID-19 ауруларының таралуын бақылау мақсатында жаңа шаралар қолға алынды. Басқарма басшысы орынбасарының айтуынша, қазіргі таңда Шымкентте ұйымдасқан ұжымдарда эпидемиологиялық қауіпсіздік күшейтілген.
«Барлық білім беру және жұмыс орындарында күн сайын таңертеңгі «сүзгі» өткізіледі. Бұл сүзгілер арқылы ЖРВИ, тұмау және COVID-19 белгілері бар адамдар дер кезінде анықталып, олардың таралуы алдын алынады. Сырқат белгілері бар балалар дереу оқудан немесе жұмысынан шеттетіледі, бұл эпидемиялық жағдайды бақылауда ұстауға мүмкіндік береді. Егер бір сыныптағы оқушылардың 20%-дан 30%-ға дейінгі бөлігі ЖРВИ-мен ауыратын болса, кабинеттік оқыту жүйесі тоқтатылып, жаңа балаларды қабылдауға тыйым салынады. Егер аурушаңдық деңгейі 30%-дан жоғары болса, сынып онлайн оқыту форматына ауыстырылады»,-деді Айгүл Тұрымбетова.
Бұл шаралар аурулардың таралуын тиімді бақылауға бағытталған.
Қалада енгізілген шаралар тұрғындардың денсаулығын сақтау және эпидемиялық қауіпсіздікті қамтамасыз ету мақсатында жүзеге асырылып отыр.
ЖРВИ ішінде тұмаудан басқа вирустар биылғы эпидемиологиялық маусымда 16 рет, ал өткен маусымда 20 рет анықталды.
Медициналық мекемелерде ЖРВИ, тұмау және COVID-19-ға қарсы алдын алу шаралары күшейтілді. 1 қыркүйектен бастап барлық мекемелер вакцинация науқанына дайындықты аяқтап, медицина қызметкерлері бетперде режиміне көшті. 15 қыркүйектен бастап осал топтарға тұмауға қарсы тегін вакцинациялау жүргізілуде. Сонымен қатар, кіреберістерде ЖРВИ және тұмау белгілері бар науқастарды анықтауға арналған арнайы сүзгілер ұйымдастырылып, мекемелерде дезинфекциялық және температуралық режимдер күшейтілді.

JQ-Aqparat
Сурет: Шымкент қаласы Өңірлік коммуникациялар қызметі