Шөп жұламын деп сотталды

05 тамыз 2023, 20:34

Шығыс Қазақстан облысында Қызыл кітапқа енген торжуаның 2 мың данасын қазып алған екі адамға сот үкімі шықты.
Глубокое аудандық сотында ҚР Қылмыстық Кодексінің 339-бабы (сирек кездесетін және құрып кету қаупі төнген өсімдіктер немесе жануарлар түрлерімен, олардың бөліктерімен немесе дериваттарымен заңсыз айналысу) бойынша қылмыстық іс қаралды.
«Екі айыпталушы Черемшанка ауылының аумағында өсіп тұрған Қазақстанның Қызыл кітабына енгізілген торжуаны қазып, жинап алған. Олардан барлығы 1923 дана өсімдік тәркіленді. Сотталушылар өз әрекеттерімен Черемшанка орман шаруашылығына қомақты материалдық шығын келтірген» деп хабарлады соттың баспасөз қызметі.
Сот үкімімен Риддер қаласының тұрғындары кінәлі деп танылып, бір жылға бас бостандығынан шектелді. Үкім әлі заңды күшіне енген жоқ.

JQ-Aqparat