Шетелден ақша алатын белсенді мен блогерге жайсыз жаңалық

АҚШ президенті Дональд Трамп мөлшері 5 млрд долларға жуықтайтын шетелдік көмекті тоқтатып, бюджет шығынын азайтпақшы.
New York Post интернет – порталы The Post басылымына сілтеме жасай отырып хабарлағандай, Ақ үй қожайыны бітімгерлік операцияларға да қаржы көлемін кемітуді көздеп отыр. Конгресті бұл жөнінде хабардар еткен Трамп елде 48 жылдан бері қолданылмаған «Қалтаны босату» (pocket rescission) тәсіліне жүгінді. Оның мәнісі мынада. Президенттік сұрау Конгреске қаржы жылы (биыл 30 қыркүйекте) тура аяқталар тұста жолданады. Сол себепті Конгрес қандай шешім қабылдайтынына қарамастан, ол міндетті түрде орындалады.
Қазынаға қайтқан әлгі 5 миллиардтың елеулі бөлігі (3,2 млрд доллар) әлемнің түкпір-түкпіріндегі шетелдік қаржымен жұмыс істейтін үкіметтік емес ұйымдарды, журналистер мен блогерлерді жарылқап келген USAID-тің қоржынына түсуі тиіс екен.
Тамп осы ұйымды кейбір елдерде ақшаны ЛГБТ-ны насихаттау сияқты түкке керексіз жобаларға жұмсады» деп айыптап, жыл басында жауып тастады. Сол кезде ақпарат құралдары сырттан грант алатын белсенділер мен тілшілердің елімізде баршылық екенін жазған болатын.
Jas Qazaq