Шавкат Рахмоновтың жұбайы жол апатына ұшырады: екі адам қаза тапты

Жамбыл облысында болған жол-көлік оқиғасы салдарынан екі адам қаза болды, тағы екі адам ауруханаға жеткізілді. Әлеуметтік желіде тараған ақпаратқа сәйкес, көлікте UFC файтері Шавкат Рахмоновтың жұбайы Гүлайым Рахмонова мен баласы және басқа да жолаушылар болған, деп хабарлайды jasqazaq.kz.

Оқиға Мойынқұм ауданында болған. Алдын ала мәлімет бойынша, Гүлайым Рахмонова өзі басқарған Toyota Land Cruiser 200 көлігімен Қарағандыдан Алматыға жол тартқан. Жолда көлік тізгініне ие бола алмай, автокөлік аударылып кеткен.

Жол апатының салдарынан екі жолаушы оқиға орнында көз жұмды. Рахмонова мен ұлы Шу қалалық ауруханасына жеткізілді. Дәрігерлер олардың жағдайын орташа ауыр деп бағалауда.

Қазіргі таңда аталған факті бойынша полиция Қылмыстық кодекстің «Көлiк құралдарын басқаратын адамдардың жол қозғалысы немесе көлiк құралдарын пайдалану қағидаларын бұзу салдарынан екi немесе одан да көп адамның абайсызда қайтыс болуына әкеп соғу» бабымен сотқа дейінгі тергеу жүргізіп жатыр.