Шахматшы Жансая Әбдімәлік тұрмысқа шықты

Танымал қазақстандық шахматшы Жансая Әбдімәлік тұрмысқа шықты. Белгілі болғандай, шахматшының таңдауы «Қазақмыс корпорациясы» ЖШС басқарма төрағасы, 34 жастағы Нұрахмет Нұриевке түскен.

Ол бұл туралы өзінің Instagram парақшасында сурет жариялап «Forever yours, forever mine. N.K.», — делінген жазба қалдырған.

Айта кетейік, Жансая Әбдімәлік 2000 жылы Алматы қаласында дүниеге келген. 2007 жылы қаңтарда өз жасындағы қыздар арасында Қазақстан чемпионы атанса, 2008 жылы да 8 жасқа дейінгі әлем чемпионатында 10/11 нәтижемен жеңімпаз атанды. Кейіннен көптеген әлемдік сайыстарда жүлделі орындарға ие болды.

Ал 2021 жылы Қазақстан Республикасының Президенті Қасым-Жомарт Тоқаев Жансая Әбдімәлікке «Құрмет» орденін табыс етті. 2022 жылы жаңадан құрылған Алматы шахмат федерациясының құрметті президенті атанды.

JQ-Aqparat