Шахмат мектеп бағдарламасына енгізіледі

Қазақстанда шахмат спортын дамытудың жол картасы әзірленіп жатыр. Мұны Алматы қаласының өңірлік коммуникациялар қызметі брифингінде Қазақстан шахмат федерациясының атқарушы директоры Гүлмира Дәулетова мәлім етті. «Біз 2016 жылы Қазақстанда 2-4 сынып оқушылары арасында шахматты үйрету бағдарламасын жүзеге асырған едік. Алайда, пандемия кезінде бұл жобамыз тежелді. Қазіргі таңда бұл бағдарламаны қайта бастап қолға алып отырмыз. Яғни, біз енді 1-4 сыныптар арасында шахмат ойнауды үйретуді мектеп бағдарламасына енгізуді мақсат етіп отырмыз. Қазір шахматты дамыту жол картасы дайындалып жатыр. Биыл қыркүйек айынан бастап 30-ға жуық мектепте бағдарлама пилоттық жоба ретінде іске қосылады», — деді Гүлмира Дәулетова. Бүгінде елімізде 7 мыңға жуық шахмат үйірмесіне балалар барады.

JQ-Aqparat