Серік Күдебаев 10 жылға сотталды

Алматы облысы Полиция департаментінің бұрынғы басшысы Серік Күдебаев 10 жылға сотталды. Ол жазасын қылмыстық атқару жүйесінің орташа қауіпсіз мекемесінде өтейтін болды.
Серік Күдебаевқа билік пен лауазымдық өкілеттігін пайдаланғаны туралы айып тағылған болатын. Бірақ Күдебаев соңғы сөзінде кінәсіз екенін айтты.
«Мен кінәлі емеспін. Тағылған айыппен келіспеймін. Халқыма оқ атпадым. Сот алдындағы процестерде жасаған әрекеттерімнің барлығы заңды екенін айтқанмын. Ешқандай азаптау болған жоқ. Жәбірленушілердің өздері оны жоққа шығарды»,- деді ол.
Бүгін сағат 11:00 де өтуі тиіс сот отырысы бірнеше сағатқа кешігіп басталды. Серік Күдебаевті сот залына арнайы күзетпен жеткізді. Сот отырысы 13:25-те басталды. Процесс басталмас бұрын Серік Күдебаевтің ұлы Арман Мырзақұлов әкесінің елге өз еркімен келгенін мәлімдеді.
Прокурор судьядан С.Күдебаевқа 9 жыл бас бостандығынан айыру жазасын тағайындауды сұрады.
Алматы облыстық Полиция департаментінің бұрынғы басшысы Күдебаев қаңтар оқиғасына қатысты күдікті деп танылған еді.

JQ-Aqparat