Сайлаубек әркімнен 23 теңге сұрайды

Түсініксіз тілде рэп оқып, әлеуметтік желі арқылы танымал болған МС Сайлаубек жаңа бейнебаянын телеарналарда көрсету үшін халықтан қаржылай көмек сұрады.

Baq.kz хабарлағандай, «Қазақстандықтар! Біз өздеріңізге өтініш жасауды жөн санадық. Жаңа клип түсіріп, оны музыкалық арналар мен әлеуметтік желілерде тарату үшін бізге қаржылай көмек қажет. Егер МС Сайлаубектің желідегі 86 мың оқырманы 23 теңгеден беретін болса, жақын арада қажетті соманы жинап, лайықты түрде жарыққа шығарар едік Біз осы мақсатта Краудфандинг өткізу туралы шешім қабылдадық», — деп жазды ол әлеуметтік желідегі парақшасында.

МС Сайлаубек жиналған қаражат толықтай «Қазақша флоу» бейнеклипіне жұмсалатынына кепілдік беріп отыр.

«Ақшаның бір бөлігі Red Dragon камерасын, ғимарат пен жарық беру құрылғыларын жалға алуға жұмсалатын болады. Бізге қазір 2 000 000 теңге қажет», — дейді ол.