Саңыраулар Сапарбаевқа жанайқайын жеткізді (видео)

Ақтөбе облысындағы халыққа қызмет көрсету орталықтарында мүмкіндігі шектеулі жандарға жағдай жасалмаған. Бұл туралы саңыраулар қоғамының өкілдері облыс әкімі Бердібек Сапарбаевқа скайппен байланысқа шыққанда жеткізді.

tilshi.kz хабарлағандай, «ең болмағанда халыққа қызмет көрсету орталықтарында арнайы орын белгілеп, сөйлей алмайтын, естімейтін адамдарға қызмет көрсетілсе екен», — дейді қалалық саңыраулар қоғамының өкілдері.

Бердібек Сапарбаев мылқауларға қызмет көрсететін маманмен скайп арқылы байланысқа шығып, мән-жайды анықтады.

«Расымен де, мемлекеттік тапсырыс аясында оларға халыққа қызмет көрсету орындарында арнайы орындар ашып, қызмет көрсету керек қой. Әйтпесе, олар өз ойларын, алаңдатқан мәселелерді қалай жеткізеді?», — деді облыс басшысы.

Айта кетейік, бүгінде саңыраулар қоғамы аясында скайп арқылы маман қызмет көрсетеді. Оған күніне орта есеппен 7-10 адам әртүрлі сұрақтармен жолығады. Көбіне, пойыздар кестесі, билет бағасы, коммуналдық қызмет көрсету, т.б. секілді сауалдар қойылады.

Қалалық саңыраулар қоғамында бүгінгі таңда 65 адам есепте тұр. Олар негізінен тігінханада арнайы киімдер тігеді. 2016 жылы қалалық саңыраулар қоғамының жанындағы оқыту-өндірістік комбинаты 130 миллион теңгенін өнімін шығарған.

https://www.youtube.com/watch?v=Iawncw31J8c&feature=youtu.be