Рыбакина үздік үштікке енді

«Ролан Гаррос» додасын жеңіспен бастаған сәтті бастаған қазақстандық теннисші Елена Рыбакина WTA рейтингісінде жоғарылады.

Рейтингтің live-нұсқасында Рыбакина төртінші орыннан үшінші сатыға көтерілді. Әйелдер арасында әлемдік рейтингтің көшбасшысы ауысты. Бұған дейін әлемнің бірінші ракеткасы атанып келген поляк қызы Ига Швентек екінші сатыға сырғыды, беларусь қызы Арина Соболенко әлемнің бірінші ракеткасы атанды. Мұндай өзгерістер ойыншыларға былтырғы «Ролан Гаррос» жарысының рейтинг ұпайлары есептелгенімен байланысты болды. Дегенмен WTA рейтингісінің қорытынды нұсқасы Франция ашық чемпионаты аяқталғаннан кейін жарияланады және теннисшілердің қорытынды орны олардың турнирде қалай өнер көрсететініне байланысты болады.
Елена Рыбакина «Ролан Гарростағы» алғашқы матчында 16 жастағы Чехия өкілі Бренда Фрухвиртованы 6:4, 6:2 жеңген болатын. Енді екінші айналымда Бренданың жерлесі Линда Носковамен күш сынасады.

JQ-Aqparat