Руслан Гацаев: Қазақ тілін білуге міндетті

«Өзге ұлт өкілдеріне қазақ тілін үйрету мәселесі 2006 жылдан бастап жоғары деңгейде атқарылып келеді. Осы уақыт аралығында көптеген тыңдаушылар арнайы курсты ойдағыдай аяқтап, сертификатқа ие болды. Тіпті, арасында курсты үздік бітіргендер де бар. Ал Андрей Дронов, Ирина Журба, Альбина Альмухамедова, Руслан Гацаев, Лев Карпов сынды тыңдаушыларымыз мемлекеттік тілді жақсы меңгеріп, облыстық, қалалық байқауларда зауыттың намысын қорғап, жүлделі орындардан көріне білді»,- дейді зауыттағы іс-жүргізу және мемлекеттік тілді дамыту бөлімінің басшысы Алима Алипова.

Қазақ тілін жетік меңгерген жұмысшылардың бірі – Руслан Гацаев. Ол зауытта автоцехтың оператор-диспетчері болып жұмыс істейді.

«Мен Ақтөбе облысы Қобда ауданындағы Ақырап ауылында туып-өстім. Мектепте орысша білім алдым. Ұлтым  шешен. Дегенмен ана тілімнен гөрі қазақ тілін жетік білемін. Достарымның басым көпшілігі қазақ балалары болғандықтан маған қазақ тілін үйрену еш қиындық туғызбады. Неге екенін білмеймін, қазақтар жаныма өте жақын. Олармен тез тіл табысып кетемін. Өмірге деген көзқарасымыз да бір жерден шығып жатады. Отбасымда ағам Зелихан, апам Мариям үшеуміз қазақ тілінде еркін сөйлеп, өзара пікір алмасамыз. Гитарамен қосылып қазақша ән айтамыз. Қазақ әндерінің әуені мен әуезі жаныма жақын. Сондықтан репертуарымда қазақ әндері көп. Тіл  достықтың дәнекері, береке мен бірліктің алтын құралы болып табылады. Қазақ жерінде бір шаңырақтың астында бейбіт өмір сүріп жатқан өзге ұлт өкілдері өздерінің жарқын болашағын мемлекеттік тілмен байланыстырады. Тілім басқа болса да тілегім, жүрегім бір. Менің Отаным – Қазақстан. Сондықтан да оның тілін, салт-дәстүрін, әдет-ғұрпын білу менің міндетім»,- дейді ол.+

Айта кетейік, 2016-2017 жылдарға арналған жоспар бойынша тіл үйрену курсында 7 топ құрылды. Зауыттың 80 жұмысшысы қазақ тілін меңгеріп жүр.

bnews.kz