Пышақпен қорқытып 5 миллион теңгесін алған (Видео)

Түркістан облысында тұрғынды пышақпен қорқытып, 5 миллион теңге бопсалаған күдіктілер құрықталды. Бұл туралы Polisia.kz хабарлады. Түркістан облыстық полиция департаментіне Леңгір қаласының тұрғыны арызданып, белгісіз біреулер күш қолданып 5 миллион теңге бопсалағанын айтқан. Аталған фактіні полицейлер ҚР ҚК-нің 194-бабы 3-бөлігі (қорқытып тартып алу) бойынша тіркеп, күдіктілерді анықтауға жедел кіріседі.
«Ақпарат бойынша қылмысты ашуға, күдіктілерді ұстауға бірден Түркістан облысы ПД ұйымдасқан қылмысқа қарсы күрес басқармасының тәжірибелі қызметкерлері мен жедел-тергеу тобы жұмылдырылды. Төлеби ауданының аумағында жедел-іздестіру іс-шараларын жүргізген полицейлер 5 миллион теңге көлеміндегі ақшаны алып тұрған жерінен 2 жігітті ұстады. Олардың біреуі бұрын сотты болған, Төлеби ауданының тұрғыны. Жедел уәкілдер тінту кезінде күдіктілерден жәбірленушінің қаражатын тәркіледі. Сондай-ақ бірінің үйін тінтігенде алты оқ табылды. Тиісті сараптама тағайындалып, қазіргі уақытта сотқа дейінгі тергеу амалдары жүргізіліп жатыр» деп мәлімдеді Polisia.kz.

JQ-Aqparat