Президент: Зейнетақы салымшыларының алдындағы жауапкершілік өте зор

«Экономикалық айналымға түсетін зейнетақы активтерін тек қана нарық талаптарына сай қолдану керек. Бұл мәселеде салымшылар алдындағы жауапкершілік өте жоғары. Қажет болса, Үкімет бірыңғай зейнетақы салымдары есебінен жүзеге асырылатын жобалардың пайыздық өсімін субсидиялауы тиіс».

Үкіметтің кеңейтілген отырысында Президент Қасым-Жомарт Тоқаев осылай деді.

«Осындай маңызды жұмысқа квазимемлекеттік құрылымдар сияқты делдалдарды қолдан жасаудың қажеті жоқ. Мұндай жағдай бұрын талай рет болған. Бұл іске тиісті сараптама жасай алатын және қажетті инфрақұрылымы бар екінші деңгейдегі банктерді белсенді түрде тарту керек», — деді Мемлекет басшысы.

Президенттің айтуынша, банктерді экономиканың нақты секторына қаржы құюға ынталандыру керек. Бұл орайда Үкімет пен Ұлттық банк өзара тығыз ынтымақтасып, бұл жұмысты бірлесіп жүргізгені дұрыс. «Ұлттық банк инфляция үдерісі мен экономиканың өсімін бақылап отыруды көздейтін тиімді жалпымемлекеттік саясатты ұстануы керек», — деп атап өтті Қасым-Жомарт Тоқаев.

JQ-Aqparat