Президент Қасым-Жомарт Тоқаев: Ұлттың рухы қашанда биік болсын!

Бүгін — Республика күні. Президент Қасым-Жомарт Тоқаев Қазақстан халқын ұлттық мерекесімен құттықтап, өз тілегін жолдады.

Құрметті отандастар!
Баршаңызды ұлттық мерекеміз – Республика күнімен шын жүректен құттықтаймын!
Қазақстанның тарихи таңдауын айқындаған Егемендік декларациясы – елдігіміздің берік тұғыры. Онда мемлекетіміздің аумақтық тұтастығының мызғымастығы, халқымыздың жалпыұлттық бірегейлігін нығайтуға ұмтылысы және азаматтарымыздың құқықтары мен бостандықтарына кепілдік берілетіндігі нақты көрініс тапқан. Осы басты қағидаттар Конституциямызда, заңдарда және Қазақстанның стратегиялық бағыт-бағдарын белгілейтін басқа да құжаттарда көрсетілген.
Республика күні ырысты ынтымақ пен өзара тілеулeстіктің арқасында халқымыздың барлық сын-қатерден сүрінбей өтіп, азаттыққа жеткенін әйгілейді. Біз бабалар аманатына адал боламыз. Ел бірлігін әрдайым нығайта береміз. Егемендігімізді қадір тұтып, көздің қарашығындай сақтаймыз.
Халқымыз тату-тәтті әрі берекелі қоғам құруға бар ерік-жігерін жұмсайды, жасампаз ісімен жаңа белестерді бағындырады. Әрбір отандасымыз Адал азамат деген атқа лайық болып, елімізді дамытуға салмақты сөзімен, өнегелі ісімен үлес қосады.
Біз бірге мақсатымызға жетеміз – баршаға бірдей мүмкіндік беретін Әділетті Қазақстанды құрамыз.
Байрағымыз көк аспанда асқақ желбіресін! Ұлттың рухы қашанда биік болсын!
Еліміз өсіп-өркендей берсін!
Сіздерге зор денсаулық, бақ-береке және толағай табыс тілеймін!