Президент ішкі істер министрін қабылдады

Мемлекет басшысы ішкі істер министрі Марат Ахметжановты қабылдады.
Марат Ахметжанов еліміздегі криминогендік ахуалға тоқталды.
Ол қылмыс саны азайғанын баяндап, CyberPol жобасының нәтижелерімен таныстырды. Есірткі қылмысына қарсы күрес бағытында жүргізіліп жатқан жұмыстардың қорытындысы туралы есеп берді:
– жыл басынан бері құқық қорғау және арнаулы органдардың бірлескен күш-жігерінің нәтижесінде 14,3 тонна есірткі, соның ішінде 71,5 кг героин, 652 кг синтетикалық есірткі тәркіленген;
– 52 есірткі зертханасын жойылып, 85 тонна прекурсор тәркіленген.
Министрдің мәліметінше, ұйымдасқан қылмыстық топтардың әрекеттері бойынша 37 қылмыстық іс тіркелген. Адам саудасына байланысты 111 қылмыс анықталған. М. Ахметжанов отбасылық-тұрмыстық салада зорлық-зомбылық жасағандарға қатысты жауапкершілікті қатаңдату шараларына тоқталып, жол-көлік оқиғаларының алдын алу және шетелдік автокөліктерді заңдастыру жұмыстарының нәтижелерін ұсынды.
Президент құқық қорғау органдарына азаматтардың конституциялық құқықтарының қатаң сақталуын қамтамасыз етуді тапсырды. Сонымен бірге Қасым-Жомарт Тоқаев ІІМ басшылығына құқықтық тәртіп пен қоғамдық қауіпсіздік деңгейін одан әрі арттыру жөнінде бірқатар міндет жүктеді.

JQ-Aqparat