Президент балуандарды құттықтады

Астана қаласында күрес түрлерінен өткен Азия чемпионатында орасан жетістікке жеткен балуандарды Мемлекет басшысы Қасым-Жомарт Тоқаев құттықтады. Бұл туралы Ақорда хабарлады.
«Сіздер байрақты бәсекеде топ жарып, ел абыройын асқақтаттыңыздар. Боз кілемде жеңіске деген ерік-жігер мен шеберліктің озық үлгісін көрсетіп, жанкүйер қауымға зор қуаныш сыйладыңыздар. Бұл – табандылық пен қайсарлықтың, тынымсыз еңбектің нәтижесі. Сіздердің жеңістеріңіз спортты серік еткен жастарды жігерлендіріп, биік белестерге бастайтыны сөзсіз. Еліміз күрес өнерін дамыту үшін барлық жағдайды жасап отыр. Балуандарымыздың дүбірлі додаларда үздіктер қатарынан көрінуі – соның айқын дәлелі» делінген Президенттің құттықтау хатында. Сонымен қатар спортшылар алдағы уақытта болатын әлем чемпионаты, жазғы Азия ойындары, келесі жылы өтетін жазғы Олимпиада ойындары сынды аламандарда ел үмітін ақтайтынына сенім білдірді.
Күрес түрлерінен Азия чемпионаты 9-14 сәуір аралығында Астанада Ж. Үшкемпіров атындағы жекпе-жек сарайында өтті. Құрлық чемпионатында медаль алған балуандар мен оларыдң бапкерлеріне де ақшалай сыйақы тағайындалатын болды. Медаль саны бойынша еліміздің балуандары Азия чемпионатында алдыңғы орыннан көрінді.

JQ-Aqparat