Президент: Астанаға ірі өндіріс орындары қажет

Мемлекет басшысы елорданың индустриялық паркіндегі жетекші кәсіпорындармен танысты.
Aqorda.resmi Телеграм-каналы жазғандай, Қасым-Жомарт Тоқаев Астананың маңызды нысандарын аралауды №1 Индустриялық парктен бастады. Мұнда Мемлекет басшысына елорданың инвестициялық тартымдылығы  жөнінде мәлімет берілді.
Астана қаласы әкімінің орынбасары Евгений Глотовтың баяндауынша, алғашқы жартыжылдықта елорданың аймақтық жалпы өнімінің көлемі 4,7 трлн теңгені құраған. Өсім – 4,1 пайыз. АЖӨ құрылымындағы үлестің басым бөлігі, яғни 73 пайыздан астамы шағын және орта бизнеске тиесілі. Ал инвестицияның үлесі – 11,5 пайыз.
Инвестиция тарту ісінде №1 Индустриялық парк айрықша рөл атқарады. Мұнда жалпы инвестиция сомасы 322 млрд теңге болатын 100 жоба жүзеге асырылып жатыр. Парк өндіріс ауқымы жағынан республикада бірінші орын алады. Іске қосылған сәттен бері  өндіріс алаңында 6,7 трлн теңгенің өнімі шығарылған.
Президент елорданың дамуына ірі өндіріс орындары аса қажет екенін айтты.

«Астана халқының саны өсіп келеді. Таяу жылдары 1,5-2 миллион адамға жетуі мүмкін. Сондықтан тұрғындарды, жастарды жұмыспен қамтамасыз етуіміз керек», – деді Қасым-Жомарт Тоқаев.

JQ-Aqparat