Прагадағы атыста 15 адам оққа ұшты

Чехия астанасындағы университет ғимаратында оқ атқан қылмыскердің қолынан 15 адам қаза тапты.
Әлемдік ақпарат құралдары хабарлағандай, қанды оқиға кеше Прагадағы Карлов университетінде болған.  Философия факультетінің ғимаратына келген қаскөй оқ атып, 15 адамды мерт қылды.

Содан кейін өзі биік қабаттан секіріп кеткен. Жиырма шақты адам түрлі дәрежеде жарақат алды. Біраз студент терезенің астына бас сауғалады. Олардың біреуі құлап кетіп, жан тапсырған.
Полиция қанды оқиғаның мән-жайын тексеруде.

Novinky басылымы жазғандай, тапа тал түсте сонша адамды қырып салған Карлов университеті философия факультетінің 25 жастағы  студенті Давид Козак екені анықталған.

JQ-Aqparat

Суреттер: sputnik.kz